Bestu nýárs óskir og þakka samfylgd
á líðandi ári.

Árið á enda, annað nýtt..
Nýr texti. H R.

Nú árið er liðið sem aldreii fyrr
og ekki mun snúa til baka.
Komið nú vindar með blússandi byr
:l: og blásið því langt út á klaka :l:

Margt sem ég ætlaði, engu að varð,
ég aumingja skapnum má glata.
Árið sem nú er að ganga í garð,
:l: það gefur mér vonir um bata :l:

Fagnandi lifi nú dag fyrir dag
og dái hve margt er að gerast.
Ég reyni að búa til lag eftir lag
:l: og láta það eyrna til berast:l:

Nærveru ástvina njótum öll vel,
nú er allt gamalt að baki.
Bræðralag eflum og bróðurlegt þel
:l: og biðjum að drottinn með vaki :l:

Comments Engar athugasemdir »

Diskurinn minn, Lifið er dans, verður til sölu á
N1 stöðvunum :
Ártúnshöfði. Bíldshöfða og Hringbraut
Borgarnesi, Staðarskála, Blönduós.
Selfossi og Hvolsvelli.

Nú fæst diskurinn bara hjá mér í síma 892 5788  á kr. 1500. 

Comments 1 athugasemd »

Vikulega sé ég og les um hörmung þá sem eiturlyfjum og neyslu þeirra fylgir.
Ungt fólk á framhaldsskóla virðist hafa góðan aðgang að þessum efnum en ekki allir nógu viljasterkir til að segja Nei takk.
Þetta er grunnurinn að þessu ljóði og vona að það hafi einhver áhrif.

TAKMARK

Nýttu vel tímann og núið
og notaðu hugans afl.
Hugarafl heilans er snúið
en hleypir þér inn á gafl.

Taktu þér allgóðann tíma
og takmark nýtt settu þér.
Þú átt við gamma að glíma,
sem götunum ráða hér.

Dópið það dömurnar meiðir,
og drengina leikur grátt.
Vinur í fyrstu þig veiðir,
í vasa hans ert am-bátt.

Dópið það deyfir og eyðir
og drepur allt nálægt sér.
Fagmenn og foreldrar leiðir,
frelsinu létta af þér.

Þú sem átt þung spor að baki
og þú sem í vanda ert.
Taktu nú sjálfa/n þig taki,
takmark er mikils vert.

Viljum öll sjá þig hér vinna
og verðmæti búa til.
Frumkvæði farðu að sinna,
þá færist þér allt í vil.

Með bestu kveðju.
Hafsteinn Reykjalin
Jóhannesson

Comments Engar athugasemdir »

Smá yfirlit.
Á afmælisdaginn minn 1. Apríl, verð þá 75 ára, kemur út ljóðabókin, Á lygnum sjó. Þetta eru 100 ljóð með gríni, glensi, alvöru og áróðri, sannleik og lausgyrtum skáldskap, já, og textum sem ég hef einnig gert lög við og eru sumir þeirra sungnir á nýja disknum, Lífið er dans.
2013 Gaf ég út Limruskjóðu með 65 limrum.
2012 gaf ég út diskinn Ljúfar stundir, 12 lög og textar frumsamdir. Er að verða uppseldur.
2012 Ljóðabókin, Út úr þokunni og þar áður og eftir, hef einnig átt ljóð í ljóðabókum sem við í Ljóðahóp Gjábakka, gefum út á hverju vori og verður það 15 árið í röð, nú í maí.
Svo er bara að vona að einhverjir hafi gaman af að lesa og hlusta já, slappa bara af.
Eitthvað fyrir alla. Ég bíð þér upp í dans.

Comments Engar athugasemdir »

Textar.
LÍFIÐ ER DANS
1
Gefðu mér svar 02:19

Lag og texti: Hafsteinn Reykjalín

Sólin að morgni oft sendir mér von,
sér um að verma hér allt lon og don.
Birtuna gefur sem berst inn til mín,
bý mig á fætur og hugsa til þín.

Dagurinn líður sem draumur hjá mér,
dagsverki lýkur og heim þá ég fer.
Símann upp tek ég og segi til mín.
Ef svarið er jákvætt þá kem ég til þín.

Kvöldið fljótt líður og komin hánótt,
kyrrð er í bænum svo anda þarf hljótt.
Þögnin og myrkrið vel þjónar oft hér,
þreytan burt líður, það ástin um sér.

Nóttina skulum við nýta sem best,
njótum vel svefnsins og dreymum sem mest.
Vöknum svo frísk öll til vinnunnar hress.
Já, vonglöð um hækkun í launum og sess.

2
Þá yrði sól 03:00
Lag og texti: Hafsteinn Reykjalín

Út í sveit nú vildi vera,
vornótt dvelja ein með þér.
Vil þitt líf að gæfu gera,
gaman ef þú birtist hér.
Nóttin björt með il og angan,
endurvekur mína þrá.
Ég vil strjúka volgan vangan,
vil þér núna dvelja hjá.

;;Þá, – yrði sól, þá yrði gaman,
þá yrði sól í hjarta mér.;;

Heyri þú mig sæla syngja,
sumarljóð er gafstu mér.
Ástarbjöllur kátar klingja,
kærleik jafnan sýna þér.
Hérna gætum setið saman,
sungið hér við tæra lind.
Veit það yrði geysi gaman,
geymi hjá mér þessa mynd.

;;Þá, – yrði sól, þá yrði gaman
þá, – yrði sól í hjarta mér.;;

Hérna gætum setið saman,
sungið hér við tæra lind.
Veit það yrði geysi gaman,
geymi hjá mér þessa mynd.

;;Þá, – yrði sól, þá yrði gaman
þá, – yrði sól í hjarta mér.;;

3
Hetjur hafsins 02:33
Lag og texti. Hafsteinn Reykjalín

Senn mun koma sjómannsdagur,
sannur þjóðhátíðabragur.
Allir þá með flögg sín flykkjast,
öll svo flott um götur hlykkjast.

Ákaft sjómenn ástvini’ fagna,
endurfundir seint oft þagna.
Feður, börn og mömmur mætast,
allir munu hér þá kætast.

Syngum hetjum hafsins,
hamingjunnar gleðisöng,
Allt sem lifir eftir dagsins,
eflum samhug kvöldin löng.

Vonglatt fólk á fögrum degi
fer á götur út sem vegi,
Syngur kröftugt kröfu gerðir,
þess nú krefst, þú hlusta verðir.

Senn mun koma …

Já, syngum hetjum hafsins,

4
Flýg um loftin 02: 35
Lag og texti. Hafsteinn Reykjalín

Flýg um loftin blá og blíð,
berst til nýrra landa.
Stillt og dreymin stól í bíð,
strákar hug minn blanda.

Bíður mín nú sjór og sól,
vil sólbrún gjarnan vera.
Stæltir strákar fá mitt hól,
stolta mig oft gera.

Nakin stundum nýt ég mín,
nýlendan er þakin.
Frelsið dáir faðmlög þín,
fæddist líka nakin.

Langar svo að vera villt,
vinum snúa’um fingur.
Vera líka stundum stillt,
stjarna dáir glingur.

Nakin stundum nýt ég mín,
nýlendan er þakin.
Frelsið dáir faðmlög þín,
fæddist líka nakin.

Þegar svo ég vel og veit,
vil ei djamma lengur.
Hitta vildi svein úr sveit,
sjálf er góður fengur.

La la la la la…

5
Strætin óma 02:48
Lag: Hafsteinn Reykjalín

Jass: Lag án texta.

6
Gleðigjafinn 02:35
Lag og texti: Hafsteinn Reykjalín

Saman okkar leiðir lágu
líkt og planað hefðum fund.
Það var eins og sumir sáu
sumarást við birkilund.

Þú varst mikill gleði gjafi
gleymi aldrei þeirri stund.
Eins og forlög okkur hafi
ætlað báðum þessa grund.

Þá var stuð og þá var gaman
það var stundum hlegið dátt.
Allt sem við þá sungum saman
syngjum aftur vel og hátt.

Þegar svo að kvöldið kemur
koma vil ég heim til þín.
Ástar ljóðið sjálfur semur
sá er bíður, elskan mín.

Þá var stuð og þá var gaman
það var stundum hlegið dátt.
Allt sem við þá sungum saman
syngjum aftur vel og hátt.

Virtu mig og vertu heima
vertu skilningsrík og góð.
Ég mun þína glaðværð geyma
gefa þér svo ástarljóð.

Þá var stuð og þá var gaman…

7
Hreyfilslagið 01:54
Lag og texti: Hafsteinn Reykjalín

Vinn hjá Hreyfli drjúgan dag,
dvel þar oft og gríp í slag.
Eigum allir flottan bíl
engir þó með sama stíl.
Til í akstur, trúðu því,
taktu´upp símann og hringdu í
;;Fimm átt a átt a fimm fimm tveir tveir,
fljótir á staðinn verða þeir;;.

Starf mitt undir stýri
stoltur hraða mér,
stundum í Stafamýri,
stundum í Gunnuhver.

Helgin oft er hörku töff,
hart að fá oft á sig blöff.
Brosum gjarnan út í eitt,
oftast fáum við þó greitt.
Til í akstur, trúðu því,
taktu´upp símann og hringdu í.
;;Fimm átta átta fimm fimm tveir tveir,
fljótir á staðinn verða þeir;;.

Starf mitt undir stýri
stoltur hraða mér,
stundum í Stafamýri,
stundum í Gunnuhver.

8
Lífsneistinn 02:44
Lag og texti: Hafsteinn Reykjalín

Ég sá þig á sundlaugar barmi,
í sólinni hér í dag,
með sólbrot á sólbrúnum hvarmi,
syngjandi ástarlag.

Mér fannst þú hin fullkomna eva,
svo fegurð þín vakti þrá.
Mig langaði líf mitt að gefa,
lifa þér alltaf hjá
.
Vera þér alltaf hjá,
sofna þér líka frá,
já, sofna í fögru fangi
og finna ást og þrá.

En ský okkur skelltist þá yfir,
við skruppum í heitan pott.
Á meðan að löngunin lifir,
lífsneistinn veit á gott

:l Vera þér alltaf hjá,
sofna þér líka frá,
já, sofna í fögru fangi
og finna ást og þrá :l

9
Fingurkoss 02:28
Lag og texti: Hafsteinn Reykjalín

Komdu með á sólarströnd
á sandinn, gula, bjarta.
Vil þér rétta vina hönd
og verma sorgmætt hjarta.

Gaman væri að ganga þar
sjá gamla drauma rætast.
Höldum létt í hefðirnar
er hjörtu okkar mætast.

Sólin geisla sendir oss
svo sólbrúnn verða megir.
Veita skal þér vinur koss
ég vil að þú hann eigir.

Gaman væri að ganga þar
sjá gamla drauma rætast.
Höldum létt í hefðirnar
er hjörtu okkar mætast.

:l Komdu með því kona hér
kann þér margt að gefa.
Fingurkoss á flugi er
og feykir burtu efa :l

10
Barnabæn 02:14

Lag og texti: Hafsteinn Reykjalín

Komdu nú á koddann þinn,
kvöldið fer að líða.
Lesa skal ég ljóðin inn,
í litla kollinn blíða.
Aftur leggðu elskan mín,
augun þarf að hvíla.
Bros á morgun bíður þín
og bjartar vættir skýla.

Nú er komin nóttin dimm,
næturhúmið leynir.
Vel þig dreymi dimma limm,
Drottinn okkur geymir.
Sofðu núna, sofðu rótt,
sæng þig yfir breiði.
Ég skal reyna’að hafa hljótt,
hamingjan þig leiði.

11
Heppinn ég 02:44

Lag og texti: Hafsteinn Reykjalín

Líf mitt gegnum ljúfar stundir,
lít ég yfir farinn veg.
Líf mitt allt og list er undir,
ljós í núna fram ég dreg.
;;Heppinn ég, heppinn ég,
heppnin virðist á einn veg.;;

Happsins nýtur, heppinn maður,
hefur tekið líf í sátt,
Sjór mér einatt sýndi daður,
sýndi einnig ginsins mátt.
;;Heppinn ég, heppinn ég,
heppnin virðist á einn veg.;;

Ginið við mér gapti þrisvar,
geigvænlegur ólgusjór.
Líf mitt hékk á línu tvisvar,
líka heppinn, orðinn stór.
;;Heppinn ég, heppinn ég,
heppnin virðist á einn veg.;;

Lífið nú í ljósi þessu,
lifi ég og nýt mín vel,
lánlaus hefði lent í klessu,
laginn ég og heppinn tel.
;;Heppinn ég, heppinn ég,
heppnin virðist á einn veg.;

Comments 1 athugasemd »

14. maí 2014 kom út ljóðabókin “Lífið er ljóð” eftir okkur í Ljóðahóp Gjábakka   Þetta er 14. bókin sem við gefum út á 14 árum sem við höfum starfað. Bókin samanstendur af þremur ljóðum eftir hvert okkar.  Forsíðan er olíumálverkið Strá, eftir mig.

Comments Engar athugasemdir »

Lífið það er leikur einn og gaman.

Texti: Hafsteinn Reykjalín

Lag: Litla flugan. Sigfús Halldórsson

Lífið það er leikur einn og gaman

leikum okkur nú í púðursnjó.

Förum upp í fjöll á bretti saman

flýtum okkur þar er kyrrð og ró.

Tökum skíðin, töskuna og nestið

og tengdamamma hún fer bílnum á

en traustlega nú treilerinn við festið

og tryggið það sem ekki glatast má.

Trall la la la tralla la la la la,

tökum alltaf góða skapið með

trall la la la tralla la la la la,

tröllum nú það léttir allra geð.


Tökum skíðin, töskuna og nestið

og tengdamamma hún fer bílnum á,

en traustlega nú treilerinn við festið,

;;og tryggið það sem ekki glatast má;;.

Comments Engar athugasemdir »

Við frístundamálarar máluðum málverk og pökkuðum því inn í plast og svo voru þau skilin eftir hér og þar um borgina og sá sem finnur eignast verkið. Þau eru öll merkt  Yfir gefin list.  Með þessu vildum við auðga gleði finnendanna og láta gott af okkur leiða.  Þetta voru hátt í 200 málverk.

Comments Engar athugasemdir »

Þann 1. desember er útgáfudagur ljóðabókarinnar Út úr þokunni sem er mín fyrsta ljóðabók en vonandi ekki sú síðasta.

Hún inniheldur 115 ljóð. Nokkur ljóðanna eru gerð á yngri árum en flest eru þau nýleg og má í þeim greina tíðaranda hvers tíma og hugarástand höfundar og þjóðar.

Þarna má finna ástarljóð, ádeilu, söknuð og hárbeitt grín og skáldabull.

Bókin verður til í verslunum Eymundsson eftir 1. desember, en einnig er hægt að panta hana með því að senda mér tölvupóst eða hringja í mig í síma 892-5788

Comments Engar athugasemdir »

Í vor kom út hljómdiskurinn Ljúfar stundir með lögum og ljóðum eftir mig. Ég fékk stórsöngvarana Helgu Möller og Ara Jónsson til að flytja lögin

Nöfn laganna.
01 Gefðu mér mynd / Ari Jónsson
02 Halló, halló / Helga Möller
03 Þá snýst hamingjunnar hjól / Ari Jónsson
04 Í blómanna veröld / Helga Möller
05 Syngjum og dönsum
06 Ég elska þig og dái / Ari Jónsson
07 Já, dönsum og dönsum
08 Ó, – þvílíkt að vita / Ari Jónsson
09 Koss á kinn / Helga Möller
10 Fuglinn á Kópavogi / Ari Jónsson
11 Lífsgleði njóttu / Ari Jónsson
12 Þér ég ljóð eitt lítið sendi / Ari Jónsson
Útgáfuár: 2012 Útgáfa: Hafsteinn Reykjalín Lagafjöldi: 12 Tegund: Popp

Hlustaðu hérna á lagið Í blómanna veröld, í flutningi Helgu Möller:

Comments Engar athugasemdir »